હવે સ્પેસથી મળશે સમગ્ર દુનિયાને ફ્રી ઈન્ટરનેટ

ન્યૂયોર્ક, 28 ફેબ્રુઆરી શુ તમને પણ ઈચ્છા થાય છે કે તમે કોઈ પણ રોક ટોક વગર ઈન્ટરનેટ વાપરો અને વધારે ઉપયોગ કરવા છતા બિલનો કોઈ પ્રશ્ન જ ના હોય? શક્ય છે કે આગામી દિવસોમાં તમારી આ ઈચ્છા પણ પૂરી શઈ શકશે. અમેરિકાની એક કંપની સમગ્ર દુનિયામાં મફતમાં ઈન્ટરનેટ આપી શકે તે પ્રમાણે સ્પેસમાં આઉટરનેટનું આયોજન કરી રહી છે. આ આઉટરનેટ સેટેલાઈટ દ્વારા પ્રસારિત કરવામાં આવતા ગ્લોબલ નેટવર્ક જેવુ હશે. વાઈ-ફાઈની આ સુવિધાથી હવે તમે સીધુ સ્પેસથી ઈન્ટરનેટ મેળવી શકશો અને તે પણ મફતમાં. ન્યૂયોર્ક સ્થિત મીડિયા ડેવલપમેન્ટ ઈન્વેસ્ટમેન્ટ ફંડ (એમડીઆઈએફ) નામની સંસ્થાના મત પ્રમાણે આ યોજના સમગ્ર દુનિયામાં લોકોને કોઈ પણ રોક ટોક વગર ફ્રી ઈન્ટરનેટ સુવિધા આપવાની છે. આ ટેક્નોલોજીના કારણે પૃથ્વી પર આવેલા હજારો સેન્ટરથી સેટેલાઈટ દ્વારા ડેટા મોકલવામાં આવશે જેનો ઉપયોગ સમગ્ર દુનિયાના લોકો તેમના ફોન અથવા કોમ્પ્યુટર દ્વારા કરી શકશે. આ સંસ્થાનું કહેવુ છે કે સમગ્ર દુનિયામાં સરેરાશ 40 ટકા લોકો પાસે ઈન્ટરનેટની સુવિધા નથી. તેથીઆ સંસ્થાના પ્રયત્નો છે કે આ ટેક્નોલોજી દ્વારા દરેક વ્યક્તિ પાસે ઈન્ટરનેટની સુવિધા હોય અને તે પણ વાઈ-ફાઈ જેવુ ઈન્ટરનેટ. આ એકતરફી એટલે કે વન વે નેટવર્ક હશે. આ નેટવર્ક દ્વારા માહિતી સેટેલાઈટ સુધી મોકલવામાં આવશે અને પછી તે જ માહિતી સમગ્ર દુનિયા સુધી સ્પેસના આઉટરનેટ દ્વારા પહોચાડવામાં આવશે. આ પ્રમાણેના નેટવર્ક ઊભુ કરવુ ખૂબ મોંઘુ છે. આ પ્રમાણેના અંતરિક્ષને સ્પેસમાં સ્થાપિત કરવાની શરૂઆત આવતા વર્ષથી કરવામાં આવે તેવી શક્યતા છે.